anos 80

A década dourada da moda galega. Os anos 80 supuxeron o renacemento da nosa industria téxtil cunha nova e marcada identidade: o deseño. Foron os anos do xa famoso lema ‘La arruga es bella’ de Adolfo Domínguez, que traspasou fronteiras e vestiu o Sonny Crocket de Corrupción en Miami; da puxanza de firmas como Antonio Pernas, Pili Carrera ou Kina Fernández; e do nacemento de Galicia Moda, movemento que agrupaba a varias empresas do sector (Gene Cabaleiro, Florentino, Charoa, D’Aquela, María Mariño, María Moreira, Caramelo…) coa fin de crear unha imaxe de marca. O resultado foi innegable: incrementouse a facturación do sector, creáronse multitude de empresas e o deseño converteuse nun trazo distintivo do sector téxtil galego.

Con–Fío en Galicia detense especialmente neste período coa mostra de recoñecidos looks destes grandes deseñadores, documentos da época como a revista Galicia Moda, imaxes dos primeiros desfiles nos que a moda galega brillaba con luz propia en cidades como París ou Barcelona grazas á pasarela ‘Luada’, e instantáneas tomadas por grandes fotógrafos de moda como Outumuro, Xoán Piñón, Luis Carré ou Eloy Lozano das creacións máis desexadas do momento: as galegas. Os 80 supuxeron tamén o nacemento do que hoxe coñecemos como o xigante Inditex e sentaron as bases de futuras empresas destacadas coa Sociedad Textil Lonia e Purificación García como grandes expoñentes, e de marcas actuais de éxito como Bimba & Lola, Viriato ou Alba Conde.